شن الإعلامي أحمد شوبير هجومًا ناريًا على اتحاد الكرة المصري برئاسة جمال علام بسبب قرار رفع رسوم اختبارات الحكام إلى 1000 جنيه.
وقال شوبير في تصريحات إذاعية صباح اليوم الأربعاء "اتحاد الكرة مشكورا هيعمل اختبارات للحكام الجدد ونزل بالسن لـ 17 سنة وده شيء جميل جدا".
وتابع "تخيل بقى انك لو من اسوان وعاوز تعمل الاختبار ده هتروح منطقة اتحاد الكرة في اسوان وتقولهم انا عاوز اعمل الاختبارات وتعرف امتى المعاد والمكان وتدفع استمارة بـ 10 ولا 20 جنيه، ده المفروض بالعقل يعني والي يحصل".
وأضاف "لكن الي حصل ايه؟ الاختبارات كلها هتكون في اسكندرية، يعني لو من اسوان ولا بورسعيد ولا بني سويف ولا اي محافظة تيجي لإسكندرية، اه والله زي ما بقولك كدة، تيجي من آخر الدنيا علشان تعمل الاختبار، ليه تعمل الاختبارات في القاهرة ولا اسكندرية بس؟".
وواصل "ما انت عندك منطقة كورة في كل محافظة وفيها لجنة كورة، ما تعمل الاختبارات هناك، طب اعمل 3 لجان تحت اشرافك وحدد مكان في الوجه القبلي والبحري والقناة والقاهرة الكبرة مثلا واعمل اختبارات هناك".
وزاد شوبير من تصريحاته "المشكلة مش هنا وبس، ده رسم الدخول بقى بـ 1000 جنيه، يعني هتجيب واحد من آخر الدنيا مواصلات وإقامة وكمان 1000 جنيه علشان الاختبار؟ انت كدة عاوز تقضي على الحكام ولا بتشجع الناس على نشر اللعبة أكتر؟".
وأردف "رئيس اتحاد الكرة من الصعيد ويعلم المعاناة الي بيعانيها الناس، زيهم زي الي من بحري وقبلي والقناة وغيرهم، الدنيا صعبة وانتوا تطلعوا قرار بكدة؟".
واختتم أحمد شوبير تصريحاته "الي بتعملوه ده لا يعجب عقل ولا دين، لازم تلغوا القرار ده فورا، خلوا الـ 1000 جنيه 100 جنيه، هو محدش بيفكر؟ مش بتبصوا في الجوابات وتدرسوا القرارات؟ خلوا الناس تدعيلكم بدل ما تدعي عليكم".
