وجه عدلي القيعي رئيس شركة كرة القدم بالنادي الأهلي رسائل هامة للاعبي الفريق الأول لكرة القدم بالنادي بعد تراجع أداء الفريق خلال المواجهات الأخيرة في بطولة الدوري الممتاز.
وقال القيعي خلال حديثه عبر قناة الأهلي: "المواعيد الكبرى بيبقى التركيز عالي طب ما التركيز يبقى عالي في الماتشات اللي انتوا شايفينها سهلة .. مفيش ماتش سهل كاس العالم ادانا دروس بس الرسايل موصلتلناش مفيش ماتش سهل".
وأضاف: "مفيش فريق كبير مخسرش من فرق لم تتأهل الارجنتين من السعودية فرنسا من تونس المغرب طلعت اسبانيا وطلعت البرتغال يعني لما تقول قبل البطولة المواجهات دي صعب تتوقعها لكن دي كرة القدم المجتهد ياخد نصيبه والمتعالي والمتراخي فاقد الشغف ملوش مكان".
وأكمل: "اللي قدامك متحمس.. الكورة دي علشان انا راجل مهاري هبقى متفوق؟ طب لو الكورة موصلتلكش محدش هيشوف قدراتك هتبقى احسن مني في ايه؟ لأن انا متحمس اوي وانت شوية حاسس ان مين اللي قدامي ده؟ اذا لعبنا بالمفهوم ده هقطع عليك ماية ونور وانت هتطلع من الماتش هيتقال مجاتلوش كورة.. الكورة دي فيها فلسفة الحياة مفيش حد لا يملك قوة ما".
وواصل: "ده مش هجوم عليكم احنا بنقولكم امكانياتكم اعلى من اللي بتقدموه وثقتنا موجودة فيكم اكتر حتى لو الناس بتترجم ان اللي حاصل ده قلة شغف".
وأتم القيعي حديثه: "ردوا على الناس دي كلها بدل ما تتقمص ومتروحش تسلم على الجمهور لا جيب جول ورد في الملعب الناس بتحب اللعيبة ليه؟ حاسين انهم متفاعلين معاهم لكن لو انت خدت ان تشجيعي ده حقك المكتسب ومش من حقي اني ازعل منك هترتكب غلطة هنا اتحدث عن النجوم مش اللعيبة الكويسة النجم يتحمل الضغوط".
