اقترب النادي الأهلي من الإعلان عن مفاجأة سارة لجماهيره، وذلك وفقًا لما صرح به محمد سراج الدين عضو مجلس إدارة النادي.
وتحدث محمد سراج خلال حديثه عبر قناة النهار، عن ملف استاد النادي الأهلي، وقال: "الملف ده كان من اهم الملفات والحلم الكبير لجماهير الأهلي ولينا كلنا وكابتن محمود الخطيب دي حاجة بالنسباله مهمة جدا واشتغلنا عليها بشكل كبير".
وأضاف: "الحاجة اللي كانت عنق زجاجة في الموضوع ده واتحلت بنشكر كل مؤسسات الدولة ان في تعاون كبير مع النادي الأهلي في الجزئية دي وخدنا الموافقات لعمل الاستاد في فرع النادي الأهلي بالشيخ زايد وخصصنا حوالي 50 فدان وتم ضمهم لشركة المنشآت الرياضية وكان عنق الزجاجة في الموضوع ده من زمان من أيام المجالس السابقة الارتفاعات ودي كانت عاملة ازمة كبيرة".
وأكمل: "الارتفاعات المسموحة وقتها كانت 6 متر ودي مينفعش تشتغل عليها كاستاد بتحتاج من 30 لـ 45 متر ارتفاع علشان تعمل استاد بسعة محترمة بداية من 40 ألف مثلا.. كانت مجهودات من الكابتن محمود الخطيب شخصيا وكان بيتابع الاتصالات مع مسئولي الدولة ونجحنا اننا نوصل لـ 30 متر ارتفاع وبعدها عملنا المؤتمر الخاص بالاستاد في الشيخ زايد وبعدها اشتغلنا على الملف في شركة الأهلي للمنشآت الرياضية".
وواصل: "شركة الأهلي للمنشآت الرياضية هي اللي متولية الأمر دلوقتي شغالين بشكل قوي على الملف وعملنا اجتماعات مع أكبر الاستشاريين في العالم قعدنا 3 ايام في ورش عمل داخل النادي الأهلي مأعلناش علشان عاوزين لما نطلع بحاجة كبيرة نعلن عنها".
وأردف: "فتحنا الباب لحقوق تسويق الاستاد وتلقينا عروض ممتازة وفي عرض الاعلان عنه ممكن يكون قريب هو عرض جادي وتم مناقشته.. هي شركة تملك حقوق التسمية ده الراعي اللي هيبقى على اسم الاستاد واكيد بمقابل مادي محترم يليق باسم النادي الأهلي وبرضوا مؤسسة وكيان عالمي كبير مع النادي الأهلي".
وأتم محمد سراج حديثه: "اعتقد ده هيبقى اضافة وده هيتم الاعلان عنه قريبا جدا وهتكون مفاجئة سارة كبيرة لجمهور الأهلي".
