تحدث محمود عبد المنعم كهربا لاعب الفريق الأول لكرة القدم بالنادي الأهلي عن الموسم الماضي، وفترة إيقافه لمدة 6 أشهر.
ويخوض كهربا رفقة الفريق الأول بالنادي الأهلي معسكرًا خارجيًا بالنمسا في الأيام الجارية، استعدادًا للموسم الجديد.
ونشر كهربا رسالة عبر صفحته الشخصية على فيسبوك: "بعد إيقاف ٦ شهور .. الحمد لله قدرت أقف على رجلي تاني و بسرعة جدًا و اكمل مسيرتي .. موسم صعب و كله ضغوطات انتهى بأن الأهلي بطل كل حاجه و بكرم ربنا و دعم جمهور الأهلي قدرنا نحقق كل البطولات اللي شاركنا فيها مكنش هينفع إننا نستسلم في وسط الطريق كان لازم نكمل للآخر زي الأهلي ما عودنا كنت بستني الإيقاف ينتهي بفارغ الصبر علشان أقدر اشارك و اجتهد."
وأضاف: "تعرضت لضغوط كتير و ناس بتحاول إنها تعطلني بس ربنا كان ديما في ضهري و نصرني الحمد لله في أي ضغط من الضغوطات الكتير اللي اتعرضتلها كنت برميه ورا ضهري و اركز في تمريني و اركز في الملعب و اسعد جمهور النادي في محاولة إني أرد و لو جزء بسيط من فضل جماهير النادي في دعمهم ليا و وقوفهم في ضهري من أول يوم كنت فيه في النادي ولا أي كلام هيوفيهم حقهم ولا هيوصف اللي في قلبي من ناحيتهم."
وأوضح: " الحمد لله قدرنا نحقق كل حاجه و في النهاية بشكر كل شخص قدملي المساعده ووقف جنبي من أول بيتي النادي الأهلي و مجلس الإدارة و المدير الفني و الجهاز بأكمله و أخواتي في الملعب إلى عمال غرفة الملابس و المنظومة جميعا و اشكر عائلتي الداعم الحقيقي و الدائم في كل الأوقات."
واختتم: "بشكر كل إللي وقف جمبي و كان بيشجعني و كان حافز إني أكمل و مستسلمش شكرا من كل قلبي .. الحمد لله."
