كود كازا ///
سمعنا ف”كود” أن المدونة مايسة سلامة الناجي رسلواليها دعوة لقاء إعلامي فأحد قنوات دولة أوروبية فمنتصف شهر نونبر اللي غادي يدخل، ولكن هي بدات تتوادع مع شي أصدقاء مقربين ديالها وأسرت لهم أنها تتوجد باش تزيد من تما وتهاجر وما تعاودش ترجع للمغرب، واخا جاوها فرص قبل باش تستقر فالخارج حيت خوتها لي كبر منها كلهوم برا، ولكن رفضت باش تبقى حدا الوالد ديالها.
شنو كتوجد دابا؟
مايسة كانت من المدونين الأوائل من 2006 لي خداو مواقع التواصل الاجتماعي وحولوها لمنصة نقاش وحراك سياسي، وهي دارتها فالمغرب وللشأن المغربي، وغير بالفايسبوك دارت اسم تيتابعوها جميع الفئات والطبقات الاجتماعية والثقافية، وعايشة فوسط موجة كبيرة ديال الاتهامات والانتقادات كاين لي تتجاوب عليه كاين لي ماداياهاش فيه، وتيتاصلوا بها سفارات وقنوات خارجية تعطي رأيها، ومسؤولين فالمغرب شحال من مرة تابعوها بشكايات ولكن ديما كتفلت منها..
واش الشكاية لي دار بيها وزير الصحة مؤخرا خلاتها تتخوف يبداو فحقها حتى هي المتابعات وقررات تخوي البلاد؟ واش حتى هي بحال عدد ديال المغاربة وصلات لمرحلة ديال اليأس من حال البلاد لدرجة غتسمح فكولشي وتزيد؟ ولا شي حاجة اخرى فحياتها الشخصية لي خلاتها تهاجر؟
ف”كود” اتصلنا بيها وسولناها واش بصاح غادية تسافر؟ هي ردات بضحكتها المعروفة. ما عطاتناش راس الخيط. ما قالت اللا ما قالت اييه.
ليام الجاية غادية تعطينا الخبر اليقين.
قبل مايسة كانو صحافيين اختارو يهاجرو. واش وصل وقت المدونين؟
