مصطفى بكرى يهاجم ساويرس: "مكانش حيلتك 5 مليون دلوقت ثروتك 240 مليار"
مصطفى بكرى يهاجم ساويرس: "مكانش حيلتك 5 مليون دلوقت ثروتك 240 مليار"
هاجم الإعلامي مصطفى بكري؛ رجل الأعمال نجيب ساويرس على خلفية تصريحاته والتي اتهم فيها الشركات الحكومية والقوات المسلحة بالسيطرة على كافة المشروعات في مصر.
وقال بكري خلال برنامج "حقائق وأسرار" المذاع على قناة "صدى البلد": "سيادة الرئيس دائما ما تسمو على من يتطاولون من يختلقون الأزمات؛ حضرتك كدة وطول عمرك كدة في تاريخك الأدب والقيم والأخلاق لكن يا فندم الشركة اللي بتكلم عنها دي شركة أوراسكوم بتاعة أل ساويرس اللي منهم الأخ نجيب اللي طلع يتهم جيشنا أنه مسيطر ومهمين ومبيدفعش ضرايب".
وأضاف: "كيف يا اخ نجيب ياللي سنة 1995 مكانش معاك 5 مليون جنيه دلوقت ثروتكم 240 مليار وعلى فكرة كلامك دة مش غلطة ولا حسن نية دانت قلتها في 2015 و16 و 17 و 18 و2020 وكل سنة تدينا الموال دة ارحم نفسك وارحمنا بقي كفاية ادعاء وكذب".
وتابع: "كل سنة 11 مليار بتشتغل بيها المطلوب اية تهيمن على البلد كلها؟ الجيش مسببلك ارتيكاريا؟ دانت من غير الجيش متقدرش تمشي خطوة دانت أيام الإخوان مشيت وسافرت برة".
وواصل: "أرجو أن تكون دي اخر مرة تجيب سيرة الجيش واخر مرة تتطاول على هذا البلد؛ بص يا اخ نجيب فلوسك اللي موديها برة ربنا يكرمك بيها بس البلد دي محدش يمسها وجيش مصر أعظم من أن حد يمسه أنت أو غيرك".
وأكمل: "البلد دي فيها رجالة تقدر تدافع عنها كويس أوي إذا كان الرئيس وجيشنا العظيم لا يمكن أن يرد على هذه الهرطقات ولكن احنا ولاد البلد دي وإذا كنت متصور أنك محمي انا بقولك لا انت ولا غيرك ولا حد من اللي فوقك يقدر يقف حائل أمام أننا ندافع عن بلدنا وشرف بلدنا".
واختتم: "احترم نفسك نحترمك؛ أنا رديت عليك أكتر من مرة ولكن يبدوا أنك مبتتعلمش الدرس البلد دي ملناش غيرها انت تقدر تدفع مليارات وتروح برة احنا ملناش غيرها هنروح فين".
