شن الإعلامي أحمد شوبير هجومًا على لاعبي النادي الأهلي والجهاز الفني للفريق بعد التعادل أمس الأحد أمام فريق سموحة في بطولة الدوري بهدف لكل منهما.
وقال شوبير في تصريحات إذاعية صباح اليوم الإثنين "سموحة كان يستحق الـ 3 نقاط أمام الأهلي، امبارح كأهلاوي حسيت ان الأهلي لم يصل استاد السلام من الاساس، مفيش لاعب إلا محمد الشناوي الي راح الملعب".
وواصل "كل لاعبي الأهلي والجهاز الفني بالاحتياطي نسيوا موعد المباراة ولم يذهبوا للقاء، ايه الأداء الباهت ده فريق بلا روح وبلا اصرار وبلا هجوم وبلا عرضيات وبلا تسديدات وبلا كل حاجة".
وأضاف "الجمهور مبقاش واثق في الفريق ولا اللاعبين بقوا واثقين في نفسهم، حسين الشحات الي ماشي كويس ما يكمل، افشة كان الأفضل في اللقاء السابق خليه يكمل، هو فين شادي حسين؟ هو انت شاريه من سيراميكا كليوباترا علشان تعمل بيه ايه؟".
وأردف "انت تعاقدت مع 3 صفقات، سافيو ماشي على سطر وسايب سطر، شادي حسين يلعب ماتش وميلعبش ماتشين، مصطفى ميسي هو انضم للأهلي اصلا؟ هو فين ومحدش شايفه ما تطلع تقول ايه وضعه وفينه؟".
واستكمل شوبير تصريحاته "زياد طارق انت قلت مش هيلعب معايا ولا يتدرب مع الفريق، هل الي بيلعب مكانه بيقدم حاجة احسن منه؟ ورأفت خليل الي مش موجود في الماتشات الي فاتت تدخله ماتش امبارح؟ روحه كانت أعلى من معظم لاعبي الأهلي امبارح والله العظيم، هل ده معقول ومقبول؟".
مضيفًا "انا مش عارف هم بيعملوا في نفسهم كدة ليه ومش فاهم السبب، هي اللعيبة فين؟ الناس بتتكلم عن سفر الأهلي لكأس العالم، هل انت كأهلاوي متطمن بالنادي في كأس العالم للأندية؟".
وأختتم شوبير تصريحاته "في حاجة غلط داخل غرفة خلع ملابس النادي الأهلي، وبرضه جوة نادي الزمالك، ومفيش نادي عاوز يكسب الدوري العام السنة دي، الأهلي والزمالك يتسندوا على بعض وفي الآخر نقول مين بطل الدوري ونقول هيييه".
