عمرو أديب عن رحيل موسيماني: "يجي يدرب المنتخب"
عمرو أديب عن رحيل موسيماني: "يجي يدرب المنتخب"
علق الإعلامي عمرو أديب؛ على رحيل الجنوب إفريقي بيتسو موسيماني من تدريب فريق الكرة بالنادي الأهلي بعد فسخ التعاقد بين الطرفين اليوم بالتراضي.
وقال أديب خلال برنامج "الحكاية" المذاع على قناة "أم بي سي مصر": "الكابتن محمود الخطيب وإدارة النادي الأهلي من أيام صالح سليم فكرة أن الأهلي أكبر من أي حد؛ ولما أطرح الكلام في الاجتماع قالوله ربنا معاك مع السلامة؛ الأهلي لو عنده لعيب ماشي أو مدرب ماشي بيقولوله مع السلامة يا حبيبي الأهلي فوق الجميع اللي هو الشعار اللي احنا عارفينه دة".
وأضاف: "هذا الرجل عنده عقد جيد جدا؛ ويرحل ويأخذ اللي كان بياخده في الأهلي؛ القيمة الأدبية أنه يبقى مدرب الأهلي خلاص والراجل قعد 20 شهر عمل سي في حلو جدا؛ وهذا الرجل قد تعرض لضغط كبير جدا لا يسمح له بالاستمرار".
وتابع: "أنت إيهاب جلال ماتش ونص عملتله مشكلة؛ والراجل بقاله 20 شهر بتكسب بطولات ويكسب الزمالك وفي النهاية تقوله لا أنت مش كويس؛ وليه مبتلعبش قفشة وكهرباء ليه مبتحبوش؟".
وأوضح: "الراجل هيعمل أية اكتر من اللي هو عمله؛ لم هدومه وهو رايح فرقة تانية بسرعة جدا وطبعا عارفين أن كان في اشاعات العشر أيام اللي فاتوا أنه وماله لو بيتسو مشي ما يدرب المنتخب".
واختتم: "انتوا عارفين المسألة في مصر تبقى قاعد بتشرب شوية شاي ويقولك بقولك أية أنا سامع أن بيتسو ماشي مانجيبه يدرب المنتخب وبعدين يقولك في حاجة تانية هو عارف لاعيبة الأهلي ولاعيبة الزمالك هيحبوه دا بيتسو جميل؛ قلب خساية الراجل قلب خساية رحل موسيماني ومنتظرين الأهلي هيجيب مين".
