برما .. فرما
برما .. فرما
البرما, اسم مكان بعيد, بيتميز بمباني عالية من الحجر
يعني كل عزبة أو بلد بعيدة فـ الصحرا, أو فـ قلب البراري القديمة, بمجرد ما يتبني فيها قصر أو بربا (معبد) من الحجر, تاخد اسم “برما”!
عشان كده كان فيه بلاد كتير فـ بحري وقبلي وسينا وسيوة كان اسمهم “برما”!
فيه بلد فـ الغربية اسمها “برما”, منسوب ليها الشيخ إبراهيم البرماوي تاني مشايخ الأزهر!
وكمان منسوب للبلد دي الحكاية الشعبية عن “حسبة برما”, ودي من الفوازير الرقمية اللطيفة!
كمان ظهر اسم المكان “برما” متصرف, بشلقبة البي التقيلة مع الفه لـ “فرما”!
بارضو كان فيه أكتر من بلد فـ الشرقية وسينا اسمهم “فرما”, وواضح إن التصريف بشقلبة الفه بتأثير احتكاك الآسيويين بالمنطقة الشرقية, يعني لغاية دلوقتي الإسرائيليين بينطقو إسم “يعقوب” بـ “ياكوف”!
من الفرما لقب وإسم عيلة “الفرماوي”!
“الفرما” المشهورة, هيه بورسعيد الحالية!
أول مرة أسمع اسمها كان فـ مسلسل “بوابة الحلواني” اللي أحداثه الرئيسية كلها بتحصل فـ مدينة الفرما وقت حفر قناة السويس, واللي كان بيعارضها ثوار من أهالي وأعيان الفرما, وده من أسباب تغيير اسمها!
من أهم أحداث مدينة الفرما القديمة أوي, معارك الفرما, الأولانية سنة 525 ق.م, أما نهزم بسماتيك التالت من قمبيز, ومعركة الفرما التانية سنة 380 ق.م, اللي بتمثل آخر انتصارات ملوك مصر القديمة من الأسرة الأخرانية (التلاتين)!
الملك “نخت-انبو” أو بطل أنوبيس, قاد معركة حربية كبيرة هزم فيها الفرس مع تحالف آسيوي كبير.
الملك البطل نختنبو قضا مدة حكمه كلها (تسعتاشر سنة) فـ حروب لتأمين حدود مصر, وحفظ أمنها, ووصا اللي بعده ميغفلوش وميكسلوش فـ تأمين الحدود وتدريب الجنود وزيادة المجهود, لأن العالم القديم كله كان طمعان فـ مصر!
يا عيني, جدنا البطل كان قلبه حاسس, شوية والدنيا كلها اتقلبت علينا, قامت معركة الفرما التالتة سنة 343 ق.م, بين نختبو التاني وأردشير, ومن ساعتها مخلصناش من احتلال الفرس واليونانيين والرومان والعرب والعثمانيين للفرنساوية والإنجليز, ولغاية دلوقتي كله طمعان فـ مصر!
ملحوظة: هذا المقال مكتوب باللغة المصرية وليس باللغة العربية.. الكلمات قد تبدو بها أخطاء إملائية مقارنة باللغة العربية، لكنها في الحقيقة صحيحة بحسب القواعد اللغوية للغة المصرية.
