يونس أفطيط – كود //
البلاغ ديال ولاية مراكش تانسيفت، لي بين فضيحة استغلال صيدلانية لمنصبها باش تسجل راجلها يدير اللقاح، واللي فعلا دارو نهار الجمعة الفايت، ونشر الصورة مفتاخر انه دارو، بين واحد المشكل كبير، وهو أنه ماكاينش تدقيق فهاد اللوائح اللي كيقدموها الصيدلانيين، أو المختبرات، والمصحات، وباقي القطاعات.
عدم التدقيق فهاد اللوائح من طرف السلطات، كيعني ان الحبل متروك على الغارب، يعني لي حط شي لائحة يتيقو فيه كأنه نبي، ولولا نشر هاد السيد لصورة على حسابه الفايسبوكي وتساءل المواطنين عليه، لكانت الامور غاتفوت بشكل طبيعي.
دابا تخيلوا شحال من واحد غايكون فاللائحة ديال المختبرات، والصيدليات، والمصحات الخاصة، والمدارس الخاصة، وزيد وزيد، شحال من واحد غايكون فهاد اللوائح وغايديورولو التلقيح وهو ماعندو علاقة بهاد المهن بتاتا، ولكن عمدو مو فالعرس.
السلطات عليها أنها تطالب الجميع إما بشواهد التقييد فالضمان الاجتماعي، او نسخة مصادقة من عقد العمل، أو أي حاجة كتثبت ان الشخص فعلا خدام فواحد من القطاعات المستفيدة، هادشي يلا كانت هناك نية فعلية للدولة انها تحارب هاد المحسوبية فالتلقيح، أما غير ذلك من نشر بلاغات تؤكد أنه جرى اكتشاف حالة أو حالتين، فهو در للرماد في العيون ليس إلا.