عبر «الدستور».. لبلبة لـ«الزعيم» فى عيد ميلاده: مش هانسى وقفتك جنبى
عبر «الدستور».. لبلبة لـ«الزعيم» فى عيد ميلاده: مش هانسى وقفتك جنبى
عبّرت الفنانة القديرة «لبلبة» عن سعادتها بالتعاون مع الزعيم عادل إمام في عدد كبير من الأعمال السينمائية والدرامية، خلال مشوارهما الفني المميز، مؤكدة حرصها على معايدته في عيد ميلاده برسالة خاصة عن طريق «الدستور».
وقالت «لبلبة» في رسالتها: «كل سنة وانت طيب يا أجمل وأطيب قلب، سنة سعيدة عليك، ويا رب دايمًا تبقى مبسوط وبصحة حلوة، أنا كنت مع حضرتك أجمل ثنائي، وعملت مع حضرتك شغل جميل جدًا، لدرجة إن الناس بتحبنا جدًا مع بعض، ولدرجة إن لما بكون في بلد الجمهور بيقولي: سلميلنا على عادل إمام».
وأضافت: «أنا استمتعت وأنا بشتغل معاك، وببقى مرتاحة وأنا بشتغل معاك، وقلبك مفتوح لكل الناس، ولكل أصحابك، ومش بانسى أبدًا التعاون اللي كنا فيه مع بعض، وقد إيه كنت بتساعدني بتوجيهات علشان نعمل شغل حلو».
وتابعت: «مش هانسى أبدًا وقفتك معايا لما فقدت والدتي الله يرحمها، انت أسعدت الجماهير في كل أدوارك الرائعة، ضحّكت الناس، وفي نفس الوقت بكيتهم، يا أعظم فنان حب فنه، وأخلصله، ربنا يخليك، ويحافظ عليك، يا زعيمنا، يا حبيبنا».
