تامر أمين يوجه رسالة إلى جمهور الأهلي وطالب للإدارة
تامر أمين يوجه رسالة إلى جمهور الأهلي وطالب للإدارة
أكد الإعلامي تامر أمين؛ أن النادي الأهلي يحتاج إلى وقفه خاصة بعد تراجع أداء فريق الكرة مؤخرا وفقدانه عدد من النقاط خلال بطولة الدوري.
وقال أمين خلال برنامج "أخر النهار" المذاع على قناة "النهار": "أنا عارف أن جمهور الأهلي زعلان ومدايق؛ أنا عايز أقولكم اللي بيحصل دة طبيعي جدا؛ المقدمات لازم تقود إلى نتائج والمقدمات اللي شفناها الفترة اللي فاتت لازم تؤدي للحالة اللي فيها فريق الأهلي لكرة القدم دلوقت".
وأضاف: "يا جمهور الأهلي الكريم أنت لما بتغني وتقول جمهوره دة حماه عالحلوة والمرة معاه بتغني بس والا مؤمن بكده؟ كل جمهور بيكون في منتهي السعادة لما فريقه بيحقق بطولات ولكن الجمهور الحقيقي اللي بيبقي مع فريقه وقت الإخفاق".
وتابع: "بالنسبة للمترددين والمتشائمين أوعى تعمل كدة؛ خليك في الحلوة والمرة معاه؛ الحلوة جاية قريب ويمكن تيجي يوم الخميس وخد مني؛ أولا لأن مباريات الأهلي والزمالك ملهاش مقياس".
وواصل: "اللي بيفهم كورة يعرف أن أهلي وزمالك التسعين دقيقة هما اللي بيحددوا ولاعبية الأهلي عارفين أهمية المباراة عشان عارفين أهمية المباراة للجمهور؛ مباريات القمة بتتعلب على تفاصيل صغيرة جدا واحد منهم أن في فرقة موفقة أو فرقة مش موفقة أو مين اللي بيسجل الأول".
وأكمل: "مع ذلك لابد من وفقة وحلول؛ أول وقفة بنادي فيها للنادي الأهلي؛ ولما أحب أتكلم عن فرقة الكورة في الأهلي أكلم مين؟ أكلم مجلس إدارة الأهلي والا اللجنة الفنية والا شركة الكرة؟ مين المسؤول دلوقتي؟ مش عارف بالظبط إيه حدود صلاحيات شركة الكرة أو لجنة الكرة أو مجلس الإدارة".
وأردف: "في حالة من التشويش ومفيش وضوح في الرؤية ودي عاملة مشكلة؛ والخطأ الكبير اللي ارتكبه مجلس إدارة الأهلي مشافش أن البطولات اللي جات السنة اللي فاتت كان لازم معاها تدعيم؛ القايمة المكونة من 30 لاعب من 10 إلى 15 منهم محتاجين يتغيروا".
واختتم: "في قوام رئيسي لم يغير أو يقوى خلال السنين اللي فاتت معملوش حساب يوم زي دة؛ الفصل بين الاختصاصات لازم يتم والدعم في الميركاتو الصيفي لازم يكون مفتوح الميزانية".
