تحدث أحمد شوبير الإعلامي بقنوات أون تايم سبورتس، عن ضرورة السماح للجماهير بدخول بعض أدوات التشجيع في إطار المسموح.
وقال شوبير خلال حديثه عبر إذاعة أون سبورت: "أنا بقالي 3 أيام بدور على تذاكر مش عارف أجيب ربنا كرمني بواحد من أعضاء مجلس إدارة نادي الزمالك جابلي 4 تذاكر بالعافية.. نظام الحجز على تذكرتي حلو لكن سعر التذكرة لازم يكون معقول".
وأضاف: "انهاردة في 20 ألف متفرج الاستاد هيفتح من الساعة 3 والماتش الساعة 7 يعني قبلها بـ 4 ساعات وهما 20 ألف بس أنا من حقي أروح قبل الماتش بخمس دقايق وألاقي مكاني وادخل لكن احنا اتعودنا تروح قبل الماتش بـ 4 أو 5 ساعات لازم يبقى في خدمات جوا الاستاد سواء أكل أو شرب وفي حاجات تبقى شعبية عادية وفي حاجات غالية للـ vip".
وأكمل: "ازاي المشجع يدخل الاستاد من غير علم؟ ما أنا ادخل معايا العلم ومعايا الطبلة الكبيرة يبقى مسموح بطبلة أو اتنين ومعروف مين بيطبل عليها لو أنت قلقان منه لكن ازاي ادخل من غير علم وطبلة.. ايه المشكلة في الطرومبيطة؟ ما اروح وازمر واتبسط وكل حاجة يا جماعة الجمهور مش على هوى حد الجمهور على هوى نفسه الجمهور على هوى اللي بيحبه الجمهور كان بيخترعلنا أغاني واحنا في المدرجات معتقدش أن ده أمر يزعل في حاجة".
وواصل: "حاجة غريبة جدا يقولك المشجع ميلبس تيشيرت عليه رقم 72 إذا كان الأهلي نفسه بيسخن بتيشيرت عليه رقم 72 ده مفيهوش شعار سياسي ممنوع منعًا باتًا الخلط بين الرياضة والسياسة في ملاعب كرة القدم المدرج ده علشان المتعة والفرحة والسعادة".
وأردف: "لكن في نفس الوقت مش شايف في مشكلة أن في أعلام تترفع ودخلة محترمة تتعمل وفي طرومبيطة وطبلة وتيشيرت بأي رقم يتلبس ايه المانع في ده".
واختتم شوبير حديثه: "الممنوعات الممنوعة أنت ملتزم بيها تمام أنت مش جاي مدرج سياسة هنا مش مكان السياسة في دولة فيها نظام وأمن واحترام لابد أن يطبق على الجميع الكبير قبل الصغير بس في نفس الوقت أديني راحتي وأنا بشجع وفي نفس الوقت أنا كمشجع بلاش الألفاظ والتطاول غني ياعم".
